काठमाडौँ – भोलि बिहानदेखि प्रतिनिधिसभा निर्वाचन हुँदैछ । निर्वाचनको तयारीका लागि देशैभर मतदान स्थल तथा केन्द्रमा निर्वाचन कर्मचारीहरू खटिएका छन् ।

अनेक सुरक्षा चुनौतीबीच सुरु हुन लागेको निर्वाचनअन्तर्गत मोरङमा भने कर्मचारीबीच नै झगडा भएको छ । बुधबार साँझ करिब ७ बजेतिर, सुनवर्षी नगरपालिका–६ स्थित पटियापाडा माध्यमिक विद्यालयको ग मतदान केन्द्रमा खटिएका कर्मचारी र एक सहायक कर्मचारीबीच झगडा भएको हो ।

नेपाल विद्युत प्राधिकरण, रंगेली वितरण केन्द्रका सहायक पाँचौं तहका कर्मचारी ३७ वर्षीय रञ्जित सिवाले मतदान अधिकृत र अन्य कर्मचारीहरूसँग गालीगलौज गर्दै निर्वाचन प्रक्रियामा अवरोध गरेको आरोप छ ।

झगडाले उग्ररुप लिएपछि प्रहरीले उनीहरूलाई नियन्त्रणमा लिएर अनुसन्धान गरिरहेको छ ।