काठमाडौं- इजरायलले इरानको राजधानी तेहरानको ‘मुटु’ मा प्रहार गरेको जनाएको छ । इजरायली सेनाले तेहरानको मुटुमा भीषण हवाई आक्रमण गरेको जनाएको हो । यसै क्रममा इरानको सरकारी समाचार एजेन्सीले राजधानी तेहरानका विभिन्न स्थानहरूमा ‘भीषण विस्फोट’ भएको समाचार सार्वजनिक गरेको छ ।

समाचारमा जनाइएअनुसार तेहरानको सेय्यद खान्दान, कासर इन्टरसेक्सन, वानक स्क्वायर र मोटाहारी स्ट्रिट जस्ता महत्वपूर्ण क्षेत्रहरूमा मिसाइल र हवाई आक्रमणका कारण ठूला विस्फोटका आवाजहरू सुनिएका छन् । अहिले तेहरानको आकाशमा कालो धुवाँको बाक्लो मुस्लो देखिएको छ ।

अमेरिका र इजरायलले इरानविरुद्ध संयुक्त रुपमा सैन्य कारवाहीलाई जारी राखेका बेला मध्यपूर्वमा क्षेत्रीय तनाव उत्कर्षमा पुगेको छ । संयुक्त आक्रमणका क्रममा इरानका सर्वोच्च नेता आयातोल्लाह अली खामेनेई मारिएपछि नयाँ नेता चुन्ने प्रक्रिया अघि बढाइएको छ ।