काठमाडौं- ओमानको दुक्म बन्दरगाहमा ड्रोन आक्रमण भएको छ । ओमान न्युज एजेन्सीले सुरक्षा स्रोतलाई उद्धृत गर्दै जनाएअनुसार दुई वटा ड्रोनले बन्दरगाहलाई निशाना बनाएका थिए ।

पछिल्लो समय अमेरिका र इजरायलले संयुक्त आक्रमण गरेपछि इरानले क्षेत्रीय रुपमा मिसाइल र ड्रोन आक्रमण तीव्र पारेको छ । संयुक्त आक्रमणमा परी इरानका सर्वोच्च नेता आयाताोल्लाह अली खामेनेई मारिएका छन् ।

घटनामा एक जना विदेशी कामदार घाइते भएका छन् । आक्रमणका क्रममा एउटा ड्रोन कामदारहरू बस्ने अस्थायी आवासमा खसेको थियो भने दोस्रो ड्रोनको भग्नावशेष इन्धन ट्याङ्कीहरू नजिकै खसेको थियो ।

दोस्रो ड्रोनबाट इन्धन ट्याङ्कीहरूमा कुनै भौतिक क्षति भने नभएको समाचारमा उल्लेख छ । यस घटनाबारे थप विस्तृत विवरणहरू अहिलेसम्म प्राप्त हुन सकेका छैनन् ।