काठमाडौं– काठमाडौंको नरेफाँटस्थित लालीगुराँस बाटिका माध्यमिक विद्यालयले २० औँ वार्षिकोत्सव समारोह शुक्रबार प्रज्ञा भवन कमलादीमा विशेष कार्यक्रमसहित आयोजना गरेको छ।

विद्यालयकै जेष्ठ अभिभावक ८५ वर्षीया वृद्धालाई प्रमुख अतिथि बनाएर गरिएको कार्यक्रममा पीजीदेखि कक्षा १२ सम्मका विद्यार्थीले आफ्ना कला र प्रतिभा प्रस्तुत गरे ।

कार्यक्रममा विद्यार्थीहरूले गायन,  नृत्यदेखि नाटक तथा तेक्वान्दोका प्रस्तुति देखाए। त्यस्तै नेपाली सेनाबाट तालिमप्राप्त राष्ट्रिय सेवा दलका विद्यार्थीहरूले मार्च पास र सलामीसहित राष्ट्रगान गाए ।

कार्यक्रममा अभिभावकसमेत रहेका चर्चित हाँस्यकलाकार सुवोध गौतमले उपस्थित सबैजनालाई मनोरञ्जन गराए । कार्यक्रममा कार्टुनिस्टसमेत रहेका शिक्षक आशिष खनालले ‘आजकलका विद्यार्थी’ शीर्षकको व्यंग्य कविता वाचन गरेका थिए ।

अभिभावक दिवस कार्यक्रममा विद्यार्थीहरूले दुईवटा नाटकसमेत देखाए। हेमन्त गौतम निर्देशक र अमृता पौडेल सहायक निर्देशक रहेको ‘जातीय विविधता, हाम्रो पहिचान’ शीर्षकको देशभक्तिपूर्ण नाटकले करिब एक हजार अभिभावकबाट प्रशंसा पायो ।

कार्यक्रममा विभिन्न भेषभूषामा सजिएका कलाकार विद्यार्थीहरुले सांस्कृतिक, मौलिक र जातीय झाँकीसहितको नृत्य प्रस्तुति पनि गरेका विद्यालयका प्राचार्य हरि शिवाकोटीले जानकारी दिएका छन्।