काठमाडौं- इरानमाथि हमला भइरहँदा अमेरिकाले कतार र बहराइनमा रहेका आफ्ना नागरिकलाई उच्च सतर्कता अपनाउन आग्रह गरेको छ । ती देशमा रहेका अमेरिकी राजदूतावासले आफ्ना नागरिकलाई सुरक्षित स्थानमा जान आग्रह गरेका हुन् ।

सुरक्षा निर्देशनमा राजदूतावासले आफ्नै आवास वा कुनै भवनमा सुरक्षित स्थान खोजेर बस्न आग्रह गरेको छ । राजदूतावासले खानेकुरा, पानी, औषधि र अन्य अत्यावश्यक कुराको जोहो गर्न पनि आग्रह गरेको छ ।

आफ्ना नागरिकलाई ‘लो प्रोफाइल’ मा रहन, आफू आसपासको वातावरणबारे सचेत रहन, प्रदर्शनबाट जोगिन पनि अमेरिकाले आग्रह गरेको छ ।

हाल राजदूतावासका सबै कर्मचारी सुरक्षित रहेको जनाइएको छ ।

गत वर्ष पनि इजरायल र अमेरिका मिलेर हमला गर्दा इरानले कतारमा रहेको अल उदेदस्थित अमेरिकी सैन्य आधारमा क्षेप्यास्त्र प्रहार गरेको थियो । यसपल्ट पनि इरानले यस्तै किसिमको आक्रमण गर्ने जोखिमबीच अमेरिकाले आफ्ना नागरिकलाई सुरक्षित रहन आग्रह गरेको हो ।