काठमाडौं– नेकपा एमालेका नेता ईश्वर पोखरेलले लिगबाट बाहिर रहेको संवैधानिक प्रक्रियालाई सही ठाउँमा ल्याउन आगामी निर्वाचन निकै महत्त्वपूर्ण रहेको बताएका छन् । 

शुक्रबार काठमाडौं निर्वाचन क्षेत्र नं ५ मा आयोजित कार्यक्रममा पोखरेलले अहिले मुलुकको लोकतान्त्रिक प्रक्रिया, संवैधानिक प्रक्रिया लिगबाट बाहिर रहेकाले त्यसलाई सही ठाउँमा ल्याउनुपर्ने आवश्यकता रहेको भन्दै निर्वाचनलाई सही परिणाम दिने अवसरको रुपमा परिणत गर्नुपर्ने बताएका हुन् । 

उनले आगामी निर्वाचनमा सहभागी भएर मुलुक रूपान्तरणको अभियानमा साथ दिन समेत आह्वान गरे ।

देशभन्दा ठूलो कुरा अरू केही हुन नसक्ने भन्दै पोखरेलले हित विपरीत भइरहेका गतिविधिविरुद्ध देशभक्तहरू एकठाउमा गोलबन्द हुनुपर्ने आवश्यकता रहेको धारणा राखे ।

अहिलेको निर्वाचन देश बनाउने र देश बिगार्नेबीचको जनमत सङ्ग्रह भएकाले देश बनाउने पक्षलाई जनताले साथ लिने उनको विश्वास छ । 

कार्यक्रममा काठमाडौं निर्वाचन क्षेत्र नं ५ मा मोबाइल चुनाव चिन्ह लिएर उम्मेदवारी दिएकी कोमल पौडेलले आफ्नो उम्मेदवारी स्थगित गर्दै पोखरेललाई समर्थन गरेको घोषणा गरेकी थिइन् ।