काठमाडौं– नेपाली कांग्रेसका सभापति गगनकुमार थापाले गठबन्धनका कारण नेपालको राजनीति दूषित बनेकाले सुधारका लागि कांग्रेसको विकल्प नरहेको बताएका छन् ।

शुक्रबार बुटवलमा आयोजित सभालाई सम्बोधन गर्दै उनले उक्त अबको ५ वर्ष कांग्रेस राजनीति सफा गर्न प्रतिज्ञासहित आएको बताएका हुन् । 

‘गठबन्धनको राजनीतिले नेपालको सिंगो राजनीतिलाई फोहर बनायो दूषित बनायो । त्यो खराब नियत राखेर सुरु गरिएको थिएन तर यसले परिणाममा हामीलाई खराब ठाउँमा पुर्‍यायो । त्यसैले नेपाली कांगेस पार्टी नयाँ संकल्पका साथ आएको छ । हाम्रो राजनीति फोहर भएको छ । त्यो फोहर भएको राजनीतिलाई हामी सफा गर्छौं,’ दाबीसहित उनले भने । 

कांग्रेसलाई सरकारमा पुर्‍याउन आग्रह गर्दै उनले आफूहरूलाई विजयी बनाएमा हरेक महिना जनतासँग छलफल गर्दै सरकारको कामकारबाही अघि बढाउने बताए । 

‘यो पाँच वर्षको समय एउटा प्रतिज्ञा गरेर आएका छौँ । फाल्गुनमा चुनावमा छ । फाल्गुनको मसान्तसम्म परिणाम आउँछ । चैतमा नयाँ सरकार बन्छ । वैशाखको १ गते कांग्रेसको नेतृत्वको सरकारले देशवासीको नाममा उभिएर आफ्नो संकल्प राख्छ,’ । उनले थपे, ‘वैशाखको एक महिना भित्र आफूले गर्ने कामको फेहरिस्त तयार गर्छ र जेठ १ गते फेरी आउँछ र तीस दिनको हिसाबकिताब जनतालाई बताउँछ । प्रश्न लिन्छ, आलोचना सुन्छ, सहन्छ, सच्याउँछ फेरि अर्को एक महिनाको लक्ष्य निर्धारण गर्छ । हामीलाई विकासको यो गति चाहिएको छ । हामी गर्छौँ,’ । 

थापाको अनुसार प्रधानमन्त्री बन्दैमा कसैले चमत्कार नगर्ने हुँदा कसैलाई राक्षसीकरण र देवत्वकरण गर्न नहुने बताए ।