झापा- पैसाको नक्कली बन्डल देखाई नेपाल र भारतका नागरिकलाई ठगी गर्दै हिँड्ने गिरोह पक्राउ परेको छ । झापा प्रहरीले मंगलबार अपराह्न सो गिरोहका सातजनालाई पक्राउ गरेको हो ।

पक्राउ पर्नेमा भारतीय नागरिकहरू अरिन्दम धर, दीपा भौमिक, सुमन सरकार, नुर कलाम शेख, अवेद अली होसैन, फारुक अज्मी र झापाको कमल गाउँपालिकाका देवेन्द्र सापकोटा छन् ।

जिल्ला प्रहरी कार्यालयले बुधबार पत्रकार सम्मेलन गर्दै नक्कली नेपाली कम्पनी खडा गरी ठगी धन्दा सञ्चालन गर्ने गिरोहलाई नियन्त्रणमा लिएको प्रहरी नायब उपरीक्षक खगेन्द्रबहादुर खड्काले बताए ।

उनीहरूको साथबाट दुईवटा भारतीय नम्बर प्लेटका गाडी, नोटको आकारमा काटिएका २१ बाकस पैसाका साथै प्रहरीको नक्कली परिचयपत्र र नक्कली कर प्रमाणपत्र पनि बरामद गरिएको प्रहरीले जनाएको छ ।

पक्राउ परेकाहरूमाथि लिखतसम्बन्धी कसुरअन्तर्गत अनुसन्धान र कारबाही प्रक्रिया अघि बढाइएको प्रहरीले जनाएको छ ।