काठमाडौँ- प्रधानमन्त्री सुशीला कार्कीले निर्वाचनको तयारी र समग्र सुरक्षा अवस्थाबारे आज बालुवाटारमा सबै सुरक्षा निकायका प्रमुखहरूसँग विस्तृत छलफल तथा समीक्षा गरेकी छन्।

प्रधानमन्त्री निवास बालुवाटारमा भएको बैठकमा देशभरको सुरक्षा प्रबन्ध, सम्भावित चुनौती तथा जोखिमका विषयमा गहन छलफल भएको जनाइएको छ। बैठकमा निर्वाचन अवधिभर शान्ति–सुरक्षा सुदृढ बनाउने, संवेदनशील क्षेत्रमा विशेष निगरानी बढाउने तथा सम्बन्धित निकायबीच प्रभावकारी समन्वय कायम गर्ने विषयमा जोड दिइएको थियो।

प्रधानमन्त्री कार्कीले हालको सुरक्षा व्यवस्थामा शंका गर्नुपर्ने कुनै ठाउँ नरहेको स्पष्ट पार्दै सम्भावित चुनौतीलाई मध्यनजर गरी आवश्यक सतर्कता अपनाइएको बताइन्। उनका अनुसार कडा निगरानी, सूचनाको प्रभावकारी आदान–प्रदान र सबै सुरक्षा संयन्त्र परिचालनमार्फत निर्वाचनलाई सुरक्षित वातावरणमा सम्पन्न गरिनेछ।

निर्वाचन स्वच्छ, निष्पक्ष, भयरहित र शान्तिपूर्ण रूपमा सम्पन्न गराउन सरकार प्रतिबद्ध रहेको उल्लेख गर्दै प्रधानमन्त्रीले सम्पूर्ण नागरिकलाई ढुक्क र निर्भयतापूर्वक आफ्नो मताधिकार प्रयोग गर्न आग्रह गरेकी छन्।