काठमाडौं– आईसीसी टी–२० विश्वकप क्रिकेट अन्तर्गत सुपर–८ अन्तर्गत मंगलबार एउटा प्रतिस्पर्धा हुँदैछ ।

सुपर–८ को समूह दुईमा रहेका इंग्ल्यान्ड र पाकिस्तानले आज प्रतिस्पर्धा गर्न लागेका हुन् । यो खेल नेपाली समय अनुसार मंगलबार साँझ ७ बजेर १५ मिनेट जाँदा श्रीलंकाको पालिखेल मैदानमा सुरु हुँदैछ ।

सुपर–८ मा पाकिस्तानले एक अंक बनाएको छ भने इंग्ल्यान्डले दुई अंक जोडिसकेको छ । पहिलो खेलमा इंग्ल्यान्डले सहआयोजक श्रीलंकालाई ५१ रनले हराउँदै सुपर आठमा सुखद् सुरुवात गरेको हो ।

सुपर आठको पहिलो खेल वर्षाले अवरुद्ध हुँदा पाकिस्तानले भने न्युजिल्याण्डसँग अंक बाँडेको छ । चार टिमले एकएक खेल खेल्दा इंग्ल्यान्ड दुई अंकका साथ शीर्ष स्थानमा छ भने पाकिस्तान एक अंकसहित तेस्रो स्थानमा छ ।

सुपर–८ को समूह एकमा भने वेस्ट इन्डिज र दक्षिण अफ्रिकाले एकएक जित निकाल्दा भारत र जिम्बाबे जितबिहीन छन् । भारत दक्षिण अफ्रिकासँग ७६ रनले पराजित हुँदा जिम्बाबे वेस्ट इन्डिजसँग १०७ रनले पराजित भएको छ ।

२० राष्ट्र सहभागी प्रतियोगिताबाट आयोजक भारत र श्रीलंकासहित जिम्बावे, वेस्ट इन्डिज, दक्षिण अफ्रिका, पाकिस्तान, इंग्ल्यान्ड र न्युजिल्यान्ड सुपर–८ मा पुगेका छन् ।

सुपर–८ मा पुगेका टोलीमध्ये समूह एकमा भारत, दक्षिण अफ्रिका, वेस्ट इन्डिज र जिम्बावे तथा समूह दुईमा इंग्ल्याण्ड, न्युजिल्याण्ड, पाकिस्तान र श्रीलंका रहेका छन् ।

टी–२० विश्वकप २०२६ को फाइनल फागुन २४ गते हुनेछ । नेपाल भने समूह चरणबाट बाहिरिएर घर फर्किसकेको छ ।