काठमाडौं – आईसीसी टी–२० विश्वकपको सुपर ८ चरणमा वेस्ट इन्डिजले जिम्बाब्वेलाई १०७ रनको फराकिलो अन्तरले पराजित गरेको छ । वेस्ट इन्डिजले दिएको २५५ रनको विशाल लक्ष्य पछ्याएको जिम्बाब्वे १७.४ ओभरमा १४७ रन बनाउँदा अलआउट भयो ।

जिम्बाब्वेका लागि ब्राड इभान्सले सर्वाधिक ४३ रन बनाए ।आठौं नम्बरमा ब्याटिङ गर्न आएका इभान्सले विष्फोटक गरे । २० बलको सामना गरेका उनले २ चौका र ५ छक्का प्रहार गरे । यस्तै डायन मायर्सले २८ रन, सिकन्दर रजाले २७, तदिवानाशे मारुमानीले १५ र टोनी मुन्योंगाले १४ रन बनाए ।

वेस्ट इन्डिजका गुडाकेश मोतीले चार विकेट लिँदा अकिल होसेनले तीन, म्याथ्यू फोर्डले दुई तथा जेसन होल्डरले एक विकेट लिए ।

त्यसअघि मुम्बईको वानखडे स्टेडियममा टस हारेर पहिले ब्याटिङ गरेको वेस्ट इन्डिजले निर्धारित २० ओभरमा ६ विकेट गुमाउँदै २५४ रन बनाएको थियो । यो जारी विश्वकपकै सर्वाधिक उच्च स्कोर हो । यसअघि ओमानविरुद्धको खेलमा श्रीलंकाले २२५ रन बनाएको थियो ।

वेस्ट इन्डिजका लागि शिमरोन हेटमायरले सर्वाधिक ८५ रन बनाए । ३४ बलका सामना गरेका उनले ७ चौका र ७ छक्का प्रहार गरे । रोभम्यान पावेलले ३५ बलमा ५९, रोमारियो शेफर्डले १० बलमा २१ रन बनाए । यस्तै कप्तान शाही होपले १४ रन बनाउँदा शेर्फेन रदरफोर्ड ३१ रनमा नटआउट रहे ।

जिम्बाब्बवेका लागि रिचर्ड न्गाराभा र ब्लेसिङ मुजरबानीले दुई दुई विकेट लिए ।