काठमाडौँ– काठमाडौं निर्वाचन क्षेत्र नंम्बर ५ मा उम्मेदवार रहेका एमाले नेता ईश्वर पोखरेललाई नै मत किन भन्दै एमालेले आफ्नो धारणा सार्वजनिक गरेको छ । राष्ट्रिय स्वाधीनताको रक्षा, सामाजिक एकताको प्रवर्द्धन, संविधानको संरक्षण तथा सुशासनमार्फत समृद्धिको यात्रालाई अगाडि बढाउने लक्ष्यसहित उनलाई समर्थन गर्न अपिल गरिएको हो ।

उनलाई मत दिनुपर्ने आधार प्रस्तुत गर्दै राष्ट्रिय सार्वभौमिकताको रक्षा र सामाजिक सद्भाव अभिवृद्धिलाई प्रमुख प्राथमिकता दिइएको छ । जनताको दशक लामो संघर्ष र बलिदानबाट प्राप्त संविधानको रक्षा गर्दै आवश्यक संशोधनमार्फत अझ जीवन्त र गतिशील बनाउने प्रतिबद्धता व्यक्त गरिएको छ । नागरिक अधिकारको कार्यान्वयन र सशक्तिकरणमार्फत राष्ट्रको स्वाभिमान र आत्मसम्मान अभिवृद्धि गर्ने लक्ष्यसमेत उल्लेख गरिएको छ ।

उनको उम्मेदवारीमार्फत सुशासन, चुस्त सार्वजनिक सेवा र भ्रष्टाचारविरुद्ध शून्य सहनशीलताको राष्ट्रिय अभियानलाई बलियो बनाइने जनाइएको छ । मौलिक सीप र उद्योगको प्रवर्द्धन, उद्यमशीलता विकास तथा श्रम संस्कृतिको विस्तारबाट रोजगारी सिर्जना गर्ने योजना अघि सारिएको छ ।

नवयुवालाई प्राविधिक तथा सीपमूलक शिक्षामार्फत स्वरोजगार र उद्यमशीलतामा जोड्ने प्रतिबद्धता पनि व्यक्त गरिएको छ ।

स्वास्थ्य बीमामार्फत गुणस्तरीय स्वास्थ्य सेवा सबै नागरिकको पहुँचमा पुर्‍याउने तथा सामुदायिक विद्यालयलाई भौतिक र शैक्षिक रूपमा सक्षम बनाउँदै संस्थागत विद्यालयसँग समन्वय गरी गुणस्तरीय शिक्षा सुनिश्चित गर्ने योजना उल्लेख गरिएको छ ।

टोखा–छहरे सुरुङ मार्ग निर्माणलाई अविलम्ब अघि बढाई नेपाल–चीन अन्तरदेशीय राजमार्ग निर्माण गर्ने लक्ष्य सार्वजनिक गरिएको छ । यसले व्यापार, पर्यटन र आर्थिक गतिविधिमा सकारात्मक प्रभाव पार्ने अपेक्षा गरिएको छ ।

लिच्छविकालीन राजधानी हाँडीगाउँको पुरातात्विक तथा सांस्कृतिक अध्ययन गरी पुनःउत्थान र सांस्कृतिक पर्यटन गन्तव्यका रूपमा विकास गर्ने योजना अघि सारिएको छ ।

बुढानीलकण्ठ मन्दिरलाई अन्तर्राष्ट्रिय धार्मिक पर्यटन गन्तव्यका रूपमा विकास गर्ने, बुढानीलकण्ठ–बागद्वार–चिसापानी हुँदै गोसाइँकुण्ड जाने पदमार्ग निर्माण गर्ने तथा तामाङ समुदायका बस्तीमा सामुदायिक होमस्टे विस्तार गर्ने लक्ष्यसमेत राखिएको छ ।

टोखाको सपनतीर्थ र चण्डेश्वरी मन्दिर लगायत धार्मिक तथा सांस्कृतिक सम्पदाको संरक्षण र उपयोगमार्फत पर्यटकीय गन्तव्य विकास गर्ने तथा टोखाको चाकुलाई अन्तर्राष्ट्रिय बजारमा पहुँच विस्तार गर्ने योजना पनि उल्लेख गरिएको छ ।

हाँडीगाउँ, टुँडालदेवी, धरमपुर, बुढानीलकण्ठ, धापासी र टोखाका सांस्कृतिक जात्रा, स्थानीय कला, संस्कृति तथा तामाङ र नेपाल भाषाको प्रवर्द्धन र संरक्षणमा जोड दिने प्रतिबद्धता व्यक्त गरिएको छ ।

काठमाडौं महानगरपालिका, बुढानीलकण्ठ र टोखा नगरपालिकामा खानेपानी, ढल निकास, फोहरमैला व्यवस्थापन, सडक सुदृढीकरण, सार्वजनिक यातायात तथा पार्क निर्माणमा प्रभावकारी समन्वय र नेतृत्व गर्ने उल्लेख गरिएको छ ।

साथै महिला, बालबालिका, ज्येष्ठ नागरिक तथा अपाङ्गता भएका नागरिकको हितमा विशेष कार्यक्रम सञ्चालन गरिने जनाइएको छ । समर्थकहरूले सूर्य चिन्हमा मतदान गरी जिम्मेवार नागरिकको परिचय दिन आग्रह गरेका छन् ।