भक्तपुर– ललितपुरको महालक्ष्मी नगरमा राष्ट्रिय स्वतन्त्र पार्टीटी उपसभापति पूजा बस्नेत विश्वकर्मा नै नेपाली कांग्रेसको सभामा पुगेकी छन् ।

उनी भक्तपुर क्षेत्र नम्बर २ नेपाली काङ्ग्रेसका उम्मेदवार कविर राणालाई जिताउन भन्दै सोमबार आयोजित एक सभामै मिसिएकी हुन्।

बालकोटमा आयोजित चुनावी सभामा पुगेकी विश्वकर्माले रास्वपाभित्र अवसरवादी हाबी भएको भन्दै कांग्रेस उम्मेदवार राणालाई विजयी गराउन भक्तपुर २ का मतदातालाई आग्रह गरिन् ।

‘म राष्ट्रिय स्वतन्त्र पार्टीको सदस्यता लिएकी व्यक्ति हुँ। कांग्रेसको घरदैलोमा किन आइरहेको छु भने मेरो पार्टीभित्रको गलत प्रवृति सुनाउन आएकी हुँ। रास्वपा स्थापनादेखिकै सदस्य हुँ तर कांग्रेससँग मेरो परिवारको साइनो भएकाले कविर दाइलाई जिताउन आएकी छु,’ उनले भनिन्,‘ नयाँलाई विश्वास गर्नुपर्छ भनेर लाग्यौँ, तर नयाँमा धेरै खराब र अवसरवादी व्यक्ति छन्। हामी अवसरवादीलाई भोट दिएर जिताउन चाँहदैनौं।’

उनले रास्वपालाई विनाश हुनबाट रोक्न कांग्रेसको मञ्चमा आएर उभिएको बताइन्। ‘कविर दाइइलाई भोट मागिरहँदा कुनै स्वार्थ छैन। यहाँ टुरिष्ट उम्मेदवार पनि आउनु भएको छ। उहाँहरू भन्दा कविर दाइ भक्तपुर २ का लागि उपयुक्त पात्र हुनुहुन्छ,’ उनले अगाडि थपिन् ।