काठमाडौं– गैरआवासीय नेपाली संघ (एनआरएनए) को अध्यक्षका प्रत्यासी रोविन शेरचनले एनआरएनएलाई एक सूत्रमा बाँध्न आफूले नेतृत्वमा दाबी गरेको बताएका छन्। 

कास्की अन्तर्राष्ट्रिय समन्वय परिषद् र कास्की पोखरा समाज जापानद्वारा आइतबार आयोजित भर्चुअल कार्यक्रममा बोल्दै शेरचनले पछिल्लो समय संस्थामा मौलाएको समानान्तर कमिटी गठन गर्ने र विभाजन गर्ने प्रवृत्तिले गैरआवासीय नेपालीका मुद्दाहरू कमजोर बनेकोमा चिन्ता व्यक्त गरे ।

शेरचनले भने, ‘अहिले हामी बाह्रौँ अधिवेशनको संघारमा छौँ। विगतमा निर्वाचन प्रक्रियालाई लिएर भएका असमझदारी र बारम्बारको फुटले संस्था नै धराशायी बनेको मैले महसुस गरेको छु। यस्तो अवस्थामा सबै साथीहरूलाई सकारात्मक सोचका साथ एउटै संगठनमा अटाउने वातावरण बनाउनु मेरो पहिलो प्राथमिकता हो।’

उनले संस्थालाई व्यक्तिगत स्वार्थभन्दा माथि उठेर इमानदार नेतृत्व र सकारात्मक परिवर्तनका साथ अगाडि बढाउनुपर्नेमा जोड दिए।

शेरचनले आफ्नो चुनावी अभियानका क्रममा विश्वभर छरिएका नेपालीहरूसँग साक्षात्कार गर्न आगामी शुक्रबारदेखि न्युयोर्क, डालस, टोरन्टो, युरोप र मध्य पूर्वका देशहरूको भ्रमण गर्ने र मार्च ८ सम्ममा नेपाल पुग्ने जानकारी समेत दिए।

कार्यक्रममा महासचिवका उम्मेदवार रहेका वर्तमान उपाध्यक्ष रामशरण सिम्खडाले संस्था जोगाउनका लागि उपयुक्त पात्रले अबको नेतृत्व लिनुपर्ने बताए ।

कार्यक्रममा कास्की अन्तर्राष्ट्रिय समन्वय परिषद्का अध्यक्ष शिव बानियाँ र कास्की पोखरा समाज जापानका अध्यक्ष कमल बाँस्तोलासहित अग्निधर देवकोटा, केदार कुँवर, तिलक चालिसे, सविन पौडेल, तीर्थ भण्डारी, अञ्जु भण्डारी, सञ्जीव श्रेष्ठ, रवीन बज्राचार्य, सन्तोष तिमल्सिना, विमल सुवेदी, बाबा राजेश्वरी थापा, राजेन्द्र गौतम र मोहन घले लगायतले रोविन शेरचनको उम्मेदवारीप्रति ऐक्यबद्धता जनाउँदै शुभकामना व्यक्त गरेका थिए ।