मोगादिशु– सोमालियाको राजधानी मोगादिशुमा रहेको होटेलमा हतियारधारी लडाकुले आक्रमण गर्दा मृत्यु हुनेको सङ्ख्या २९ पुगेको छ ।

मोगादिशुमा रहेको मका अल मुकारम होटेलमा हतियारधारी लडाकुले आक्रमण गरेको सोमाली अधिकारीले जनाएका छन् ।

शुरुमा आक्रमणकारीले होटेलको प्रवेशद्वारमा दुईवटा बम विष्फोट गराएको र पछि उनीहरु भागेर नजिकका भवनमा गई मानिसहरुमाथि जथाभावी गोली चलाउन थालेको अन्तर्राष्ट्रिय सञ्चारमाध्यमले जनाएका छन् ।

आक्रमणमा २९ जनाको ज्यान जानुका साथै अन्य ८० जनाभन्दा धेरै घाइते भएको बताइएको छ ।

आक्रमणमा मारिनेमा अधिकांश सर्वसाधारण रहेको प्रहरीले जनाएको छ ।

आक्रमणमा सोमालियामा सक्रिय इस्लामिक लडाकु समूह अल शबाबको संलग्नता रहेको बताइएको छ ।

अल शबाबले राजधानी मोगादिशुसहित सोमालियाका विभिन्न क्षेत्रमा बेलाबेला यस्ता आक्रमण गर्दै आएको छ ।