काठमाडौं – आईसीसी टी–२० विश्वकपको सुपर ८ चरणमा दक्षिण अफ्रिकाले भारतलाई ७६ रनको फराकिलो अन्तरले पराजित गरेको छ । यो जितसँगै दक्षिण अफ्रिकाले सुपर ८ चरणमा महत्वपूर्ण अंक जोड्दै सेमिफाइनलकाे सम्भावना बलियो बनाएको छ ।

एक सय ८८ रनको लक्ष्य पछ्याएको भारतको ब्याटिङ क्रम सुरुआतदेखि नै अस्थिर देखियो । निरन्तर विकेट पतन हुँदा भारतीय टोली १८.५ ओभरमै १११ रनमा अलआउट भयो ।

भारतका शिवम दुवेले ३७ बलमा ४२ रन बनाउनु बाहेक अन्य ब्याट्सम्यान चल्न सकेनन् । ओपनर इशान किसन पहिलो ओभरमा नै शुन्य रनमा आउट भएका थिए । यस्तै अर्का ओपन अविशेष शर्मा पनि १५ रन बनाएर आउट भए । कप्तान सूर्यकुमार यादवको ब्याटिङ आजको खेलमा चल्न सकेन । उनले २२ बलको सामना गर्दा मात्रै १८ रन बनाए ।

दक्षिण अफ्रिका मार्को जेन्सेनले चार विकेट लिए । ३.५ ओभर बलिङ गरेका उनले २२ रन खर्चिए । यस्तै केशव महाराजले तीन, कोर्बिन बोशले दुई र एडन मार्करामले एक विकेट लिए ।

यसअघि भारतको नरेन्द्र मोदी स्टेडियमा टस जितेर पहिले ब्याटिङ रोजेको दक्षिण अफ्रिकाले निर्धारित २० ओभरमा सात विकेट गुमाउँदै १८७ रन बनाएको थियाे । दक्षिण अफ्रिकाका लागि डेभिड मिलरले सर्वाधिक ६३ रनको बनाए । ४५ बलको सामना गरेका उनले ७ चौका र ३ छक्का प्रहार गरे ।

यस्तै डेवाल्ड ब्रेभिस ४५, ट्रिस्टन स्टब्स ४४ रनमा आउट भएका थिए । दक्षिण अफ्रिकाका अन्य ब्याट्सम्यानले दोहोरो अंकमा रन जोड्न सकेनन् ।

भारतमा लागि जसप्रित बुमराहले ३ विकेट लिए । चार ओभर बलिङ गरेको उनले मात्रै १५ रन खर्चिए । अर्शदीप सिंहले २ विकेट लिँदा वरुण चक्रवर्ती र शिवम दुवेको नाममा एक एक विकेट रह्यो ।