काठमाडौं- भारतको नयाँ दिल्लीमा आयोजित एआई इम्प्याक्ट सम्मेलनमा दक्षिण एसिया, अफ्रिका र दक्षिणपूर्वी एसियाका नीति निर्माता तथा प्रविधि विज्ञहरूले कृत्रिम बुद्धिमत्ता (एआई) को क्षेत्रमा आपसी सहकार्य बढाउने प्रतिबद्धता जनाएका छन् । आर्थिक र सामाजिक विकासका लागि एआईलाई कसरी प्रयोग गर्ने भन्नेबारे छलफल गर्न ‘ग्लोबल साउथ’ मुलुकका प्रतिनिधिहरू भारतमा भेला भएका हुन् ।

सम्मेलनमा सहभागी इन्डोनेसियाको सूचना तथा सञ्चार मन्त्रालयकी प्रतिनिधि कौत्सरिना आदमले एआईमार्फत अर्थतन्त्र सुधार गर्न र शिक्षामा दक्ष जनशक्ति तयार पार्न यो सम्मेलन महत्त्वपूर्ण रहेको बताइन् । उनले भारतको डाटा सेट र कानुनी ढाँचाबाट इन्डोनेसियाले लाभ लिन सक्ने उल्लेख गरिन् ।

युगान्डाकी वरिष्ठ इन्जिनियर आइरिन कारुङ्गी सेकिटोलेकोले आफ्नो देशमा एआई भर्खरै सुरुवाती चरणमा रहेको बताउँदै भारतले कसरी स्थानीय समस्या समाधान गर्न एआई प्रयोग गरिरहेको छ भन्ने कुरा सिक्न चाहेको बताइन् । उनले आफ्नो मुलुकमा पूर्वाधारको कमी रहेकाले कम्प्युटिङ पावर र प्रविधिमा साझेदारीका लागि हामी भारतसँग मिलेर काम गर्न चाहेको बताइन् ।

घानाको डाटा सुरक्षा आयोगका म्याक्सवेल अबाबियोले आफ्नो मुलुकले आफ्नै राष्ट्रिय एआई रणनीति बनाइरहेको जानकारी दिए । उनले प्रविधिको क्षेत्रमा भारतले गरिरहेको प्रगतिको प्रशंसा गर्दै आगामी दिनमा थप गहिरो सहकार्य हुने विश्वास व्यक्त गरे ।