काठमाडौं- अष्ट्रेलियामा चीनका लागि जासुसी गरेको आरोपमा दुई जना चिनियाँ पक्राउ परेका छन् । पक्राउ पर्नेमा २५ वर्षीय पुरुष र ३१ वर्षीया महिला रहेका छन् ।

उनीहरुले चीनका लागि स्थानीय बौद्ध धर्म मान्ने समूहको जासुसी गरेको अभियोग लगाइएको छ । उनीहरुमाथि सन् २०१८ मा जारी गरिएको कानुनअनुसार ‘जथाभावी विदेशी हस्तक्षेप’ को अभियोगमा मुद्दा दर्ता गरिएको जर्मन प्रसारक डोइच वेलेले जनाएको छ ।

अभियोग प्रमाणित भए उनीहरुलाई १५ वर्षको जेल सजाय हुनेछ । उक्त कानुनबमोजिम अभियोग चिनियाँ नागरिकविरुद्ध दर्ता गरिएको यो दोस्रो घटना हो ।

यसअघि तीन जना चिनियाँविरुद्ध यसै कानुनबमोजिम अभियोग दर्ता गरिएको थियो ।

उनीहरुले चिनियाँ सुरक्षा निकाय जनसुरक्षा ब्युरोका लागि अष्ट्रेलियाको राजधानी क्यानबेरामा रहेको गुआन यिन चित्त बौद्ध समूहको जासुसी गरेको जनाइएको छ । चीनले गुआन यिन चित्तलाई ‘धर्मान्ध समूह’ को संज्ञा दिने गरेको छ ।