काठमाडौं– सहरी विकास मन्त्रालय अन्तर्गतको बागमती सभ्यता एकीकृत विकास समितिले काठमाडौंका नदीहरूमा तैरिने फोहोर संकलन गर्न ‘ट्रास बेरियर’ जडान गरेको छ । ६५ लाख रुपैयाँ खर्च गरेर यस्ता बेरियर राखिएको हो ।

गत साउन २ गते सम्झौता गरेर ६ ठाउँमा ट्रास बेरियर राखिएको छ । गोकर्ण ब्यारेजभन्दा माथि, गुहेश्वरी नजिक, पशुपतिभन्दा तल तीलगंगामा, मनोहरा र बागमतीको दोभानमा, युएन पार्कमा र कर्मनासा मिसिने ठाउँ बालकुमारीमा बेरियर जडान गरिएको छ ।

आयोजनाका उपनिर्देशक उद्धव नेपालका अनुसार ट्रास बेरियरले नदीमा तैरिने फोहोर जस्तै– प्लास्टिक, प्लास्टिकका बोत्तल, काठका टुक्राहरू, फोम लगायतका तैरिँदै बगेर आउने वस्तुलाई रोक्छ र एकै ठाउँबाट सङ्कलन गर्न सजिलो हुन्छ । परीक्षणको रुपमा यसलाई सुरु गरिएको हो ।

प्रारम्भिक रुपमा प्रभावकारी नै देखिएको उनले बताए । पानीको सतह घटबढ हुँदा बेरियर आफैँ तलमाथि हुन्छ । आगामी बर्खा सिजनमा यसले कसरी काम गर्छ त्यो हेरेर थप ठाउँ र नदीहरूमा राख्नेबारे तय गरिने नेपालले बताए ।

तस्बिर : नेपाल फोटो लाइब्रेरी