काठमाडौं – आईसीसी टी–२० विश्वकप अन्तर्गत समूह चरणको अन्तिम खेलमा अस्ट्रेलियाले ओमानलाई ९ विकेटले पराजित गर्दै शानदार जित हासिल गरेको छ। श्रीलङ्काको क्यान्डीस्थित पल्लेकेले अन्तर्राष्ट्रिय क्रिकेट मैदानमा शुक्रबार सम्पन्न खेलमा ओमानले दिएको १ सय ५ रनको लक्ष्य अस्ट्रेलियाले मात्र ९.४ ओभरमा १ विकेट गुमाएर पूरा गर्‍यो।

अस्ट्रेलियाको जितमा कप्तान मिचेल मार्श नायक बने । उनले आक्रामक ब्याटिङ गर्दै ३३ बलमा ६४ रनको अर्धशतकीय पारी खेले । उनको इनिङ्समा ७ चौका र ४ छक्का समावेश थिए । ओपनर ट्राभिस हेडले १९ बलमा ३२ रन जोड्दै टोलीलाई उत्कृष्ट सुरुआत दिलाए भने जोस इंग्लिसले १२ रन बनाए ।

यसअघि टस जितेर बलिङ रोजेको अस्ट्रेलियाले ओमानलाई १६.२ ओभरमा १०४ रनमै अलआउट गराएको थियो ।

ओमानका लागि वसिम अलीले सर्वाधिक ३२ रनको योगदान दिए । अन्य ब्याट्सम्यानले उल्लेख्य प्रदर्शन गर्न सकेनन् । ओमानलाई सस्तोमा समेट्न अस्ट्रेलियाका स्पिनर एडम जाम्पाले उत्कृष्ट बलिङ गर्दै ४ विकेट लिए। त्यस्तै ग्लेन म्याक्सवेल र जेभियर बार्टलेटले समान दुई–दुई विकेट हात पारे ।

यद्यपि, अस्ट्रेलियाको यो जित केवल प्रतिष्ठाका लागि मात्र सीमित रह्यो । यो समुहमा जिम्बाब्वे र आयरल्यान्डबीचको खेल वर्षाका कारण रद्द भएपछि जिम्बाब्वे सुपर–८ चरणमा पुगेको छ । योसँगै जारी विश्वकपमा अस्ट्रेलियाको समूह चरणमै यात्रा समाप्त भएको छ । सन् २०२१ को टी–२० विश्वकप विजेता अस्ट्रेलिया सन् २००९ पछि पहिलो पटक समूह चरणबाट बाहिरिएको हो।