काठमाडौं- आईसीसी टी-२० विश्वकप प्रतियोगिता अन्तर्गत बिहीबार सम्पन्न खेलमा जिम्बाब्वेले श्रीलंकालाई पराजित गरेको छ । श्रीलंकाको कोलम्बोस्थित रणसिंघे प्रेमादासा रंगशालामा आयोजित खेलमा जिम्बाब्वेले घरेलु टोलीलाई छ विकेटले पराजित गरेको हो ।

श्रीलंकाले दिएको १ सय ७९ रनको लक्ष्य जिम्बाब्वेले खेल सकिन ३ बलअगावै भेट्टायो । जिम्बाब्वेका लागि ओपनर ब्याटर ब्रायन बेनेटले ४८ बलमा ६३ रन बनाए । यस क्रममा उनले ८ चौका प्रहार गरे ।

त्यसैगरी, सिकन्दर राजाले जिम्बाब्वेका लागि २६ बलमा ४५ रन बनाए । यस क्रममा उनले दुई चौका र चार छक्का प्रहार गरे । त्यस्तै, टाडिवानासे मरुमानीले २६ बलमा ३४ रन जोडे ।

श्रीलंकाका दुशन हेमन्थाले सर्वाधिक दुई विकेट लिए । त्यसैगरी, दुनिथ वेल्लालागे र दशुन सनाकाले समान एक विकेट लिए ।

त्यसअघि टस जितेर पहिले ब्याटिङ गरेको श्रीलंकाले निर्धारित २० ओभरमा ७ विकेट गुमाउँदै १ सय ७८ रनको योगफल तयार पार्‍यो ।

श्रीलंकाका लागि पथुम निस्सान्काले सर्वाधिक ६२ रन बनाए । ४१ बलको सामना गरेका उनले ८ चौका प्रहार गरे । त्यस्तै पवन रत्नायकेले २५ बलमा ४४ रन बनाए । उनले तीन चौका र दुई छक्का प्रहार गरे । कुशल परेराले १४ बलमा २२ रन बनाए ।

बलिङतर्फ जिम्बाब्वेका ग्रेम क्रेमर, ब्राड एभान्स र ब्लेसिङ मुजारब्बानीले समान दुई विकेट लिए । रायन बर्लले एक विकेट लिए ।

समूह बीमा रहेका जिम्बाब्वे र श्रीलंका यसअघि नै सुपर ८ मा प्रवेश गरिसकेका छन् । यस समूहबाट आयरल्याण्ड, अष्ट्रेलिया र ओमन यसअघि नै समूह चरणबाटै बाहिरिसकेका छन् ।