काठमाडौं– बलिउड अभिनेता सलमान खानका पिता, प्रसिद्ध कथा–पटकथा लेखक सलीम खानको स्वास्थ्य बिग्रिएपछि उनी मुम्बईस्थित लीलावती अस्पतालमा भेन्टिलेटरमा राखिएका छन्।

मंगलबार बिहान अस्पताल भर्ना गर्दा चिकित्सकहरूले उच्च रक्तचाप र प्यानिक अट्याक देखिएको जानकारी दिएका थिए। थप परीक्षणमा उनका मस्तिष्कमा रगत जमेको र रक्तस्राव भएको पुष्टि भएको छ।

सलीम खानको स्वास्थ्यमा समस्या देखिएपछि उनका छोरा सलमान खानले आफ्नो फिल्म सुटिङ रोक्दै तुरुन्त अस्पताल पुगेका थिए। यसै क्रममा बलिउडका अन्य दिग्गज अभिनेता संजय दत्त र गीतकार जावेद अख्तर पनि उनलाई भेट्न पुगेका थिए। उनका अर्का छोरा अरबाज खान पत्नी शूरासँगै अस्पताल पुगेका छन्।

अस्पताल स्रोतका अनुसार सलीम खानको अवस्था स्थिर भएता पनि चिकित्सकहरूले उनको निगरानी जारी राख्ने बताएका छन्।