झापा– गत भदौ २४ गते जेन-जी आन्दोलनका क्रममा लुटिएको पेस्तोल, म्याग्जिन र गोली झापाको कन्काई नगरपालिका–८ मिश्रा टोलबाट बरामद भएको छ।

जिल्ला प्रहरी कार्यालय झापाका प्रहरी नायव उपरीक्षक खगेन्द्र बहादुर खड्काका अनुसार जेन-जी आन्दोलनको क्रममा इलाका प्रहरी कार्यालय अनारमनीबाट लुटिएको सीएफ ९८९ एमएम पेस्तोल १ थान, ४० राउण्ड गोली र म्याग्जिन १ थान बरामद भएको हो ।

उक्त पेस्तोल र गोली स्थानीय तुलबहादु थापा मगरको घर पछाडि कुखुराको खोरमा लुकाई राखेको अवस्थामा भेटिएको हो। प्रहरीले तुलबहादुरको घरमा लागुऔषध लुकाइरहेको थाहा पाएपछि छापा मारेको थियो । तर लागुऔषध खोज्दा प्रहरीबाट लुटिएको पेस्तोल भेटिएको शो ।

प्रहरीले उक्त पेस्तोल बरामद भएपछि सुजय राजवंशीलाई पक्राउ गरेको छ । उक्त हतियार सुजयले नै भदौ २४ गत प्रहरी कार्यालयबाट लुटपाट गरेको पुष्टि भएको छ ।

तर उक्त पेस्तोल लुकाउने काममा संलग्न तुलबहादुर थापाका छोरा सौगात थापा मगर भने फरार भएका छन् । उनको खोजीकार्य भइरहेको प्रहरीले जनाएको छ।

घटनामा संलग्न २२ वर्षीय सुजय राजवंशीलाई नियन्त्रणमा लिएर मुलुकी अपराध संहिता २०७४ अनुसार अनुसन्धान र कारबाही भइरहेको खड्काले बताए ।