ललितपुर- जबरजस्ती करणी मुद्दामा सजाय काटिरहेका एक कैदी नख्खु कारागारबाट फरार भएपछि प्रहरीले पुनः पक्राउ गरेको छ।

प्रहरीका अनुसार भदौ २३ र २४ गतेको जेन्जी आन्दोलनका क्रममा कारागार कार्यालय नख्खु, ललितपुरबाट भागेका अशोक भन्ने अनिष भुजेललाई आइतबार साँझ करिब ५:४५ बजे लगनखेल बसपार्कबाट पक्राउ गरिएको हो। गोप्य सूचनाका आधारमा खोजतलास गर्दा उनलाई नियन्त्रणमा लिइएको प्रहरीले जनाएको छ।

भक्तपुर जिल्ला अदालत को २०७९ असार २२ गतेको फैसलाअनुसार भुजेललाई १३ वर्षीया नाबालिकामाथि जबरजस्ती करणी गरेको अभियोगमा १२ वर्ष कैद र पाँच लाख रुपैयाँ जरिवाना तोकिएको थियो।

दोलखा शैलुङ गाउँपालिका–७ फस्कु घर भई हाल ललितपुर महानगरपालिका–९ भोलढोका बस्दै आएका २२ वर्षीय भुजेललाई पक्राउपछि पुनः कारागार कार्यालय नख्खु पठाइएको प्रहरीले जनाएको छ।