काठमाडौं – नायिका रेखा थापा ८ वर्षपछि निर्देशनमा फर्किने भएकी छन् । उनले महाशिवरात्रिको अवसर पारेर आइतबार एक कार्यक्रममा फिल्म ‘माया भनेको यस्तै होला’ निर्माणको घोषणा गरेकी छन् ।

रेखाले दुई मिस नेपालहरू सृष्टि श्रेष्ठ, नम्रता श्रेष्ठ र पूर्वमिस नेपाल इन्टरनेसनल नीति शाहलाई शीर्ष भूमिकामा लिएकी छन् । फिल्ममा उनीहरूका साथै मदनकृष्ण श्रेष्ठ र दिल श्रेष्ठ मुख्य भूमिकामा रहनेछन् ।

रेखाको तेस्रो निर्देशनमा ‘माया भनेको यस्तै होला’ बन्न लागेको हो। यसअघि उनले आफ्नै ‘होम ब्यानर’बाट ‘हिम्मतवाली’ र ‘मालिका’ निर्देशन गरेकी थिइन्।

उनले पहिलो पटक बाहिरी ब्यानरको फिल्म निर्देशन गर्न लागेकी हुन्। यो फिल्म ‘दिया एन्ड अमु फिल्मस्’ को ब्यानरमा बन्ने बताइएको छ।

निर्माण घोषणासँगै फिल्मका दुई पोस्टर पनि सार्वजनिक गरिएको छ। एउटा पोस्टरमा नायक दिल श्रेष्ठ, नीति र सृष्टि प्रेम सम्बन्धमा रहेको जस्तो देखिन्छ। नम्रता भने दिलको स्त्री मोह चरित्रप्रति असन्तुष्ट रहेको पोस्टरमा झल्किन्छ।

अर्को पोस्टरमा मदनकृष्ण र दिल फिचर्ड छन्, जहाँ मदनकृष्ण ह्विलचियरमा देखिन्छन् । यसले मदनकृष्ण र दिल बाबु–छोराको भूमिकामा रहेको सङ्केत गर्छ ।

रेखाका अनुसार यो फिल्मको छायाङ्कन फागुन दोस्रो साताबाट सुरु हुनेछ। वि.सं. २०८३ सालको तीज लक्षित गरी फिल्म प्रदर्शनमा ल्याउने उनको लक्ष्य छ। यो फिल्मको स्क्रिप्ट ध्रुव लम्सालले लेखेका हुन्।