काठमाडौं- राष्ट्रिय प्रजातन्त्र पार्टी राप्रपाले मुलुकको राष्ट्रियता अत्यन्तै कमजोर अवस्थामा रहेको भन्दै चिन्ता व्यक्त गरेको छ ।

आगामी फागुन २१ गतेको प्रतिनिधिसभा निर्वाचनका लागि शनिबार घोषणापत्र सार्वजनिक गर्दै राप्रपाले राष्ट्रिय एकता र सामाजिक, धार्मिक सद्भाव खल्बलिन पुगेको, बहुजातीय, बहुभाषिक, बहुधार्मिक र भौगोलिक विविधता भएको नेपालजस्तो मुलुकमा विविधतालाई एकतामा जोड्ने संयन्त्र र संरचनाहरु कमजोर र ध्वस्त बनाइएको भन्दै चिन्ता व्यक्त गरेको हो ।

‘राष्ट्रिय एकताका आधारहरु भत्काइएको छ । मुलुकको पहिचान समाप्ति उन्मुख छ । राष्ट्रिय पहिचान र ईतिहास मेटाउने गम्भीर षड्यन्त्र भैरहेको छ ।’ घोषणापत्रमा उल्लेख छ ।

राप्रपाले घोषणापत्रलाई ‘संकल्पपत्र’ नाम दिएको छ । पार्टीले घोषणापत्रमा हिन्दू राष्ट्र, राजसंस्था, प्रदेश संरचनाको खारेजीजस्ता विषयलाई प्रमुख एजेन्डा बनाएको छ ।

घोषणापत्रमा पार्टीले अबको गन्तव्य पृथ्वीपथमा आधारित सबल, समृद्ध र समुन्नत नेपाल रहेको जनाएको छ ।

पार्टीले मलुकको राजनीति राजनीतिक दल र नेताको विकासका लागि भएपनि देश र जनताका विकासका लागि हुन नसकेको उल्लेख गरेको छ ।