काठमाडौं – काठमाडौं लगायत देशभरका सिनेमाघरमा आज शुक्रवारदेखि अनमोल केसी स्टारर फिल्म ‘क्याप्टेन’ र आशिरमान देशराज जोशी स्टारर फिल्म ‘ब्रेकअप’ रिलिज गरिएको छ ।

दुवै फिल्मले बिहानी शोमा भने खासै उत्साहजनक व्यापार गर्न सकेका छैनन् ।

सिंगल थिएटर तथा मल्टिप्लेक्स हलमा रिलिज भएका यी दुई फिल्म जानराका हिसाबले फरक–फरक विधामा निर्माण भएका फिल्म हुन् । अनमोल केसी अभिनित ‘क्याप्टेन’ स्पोर्टस् जानरामा निर्माण भएको फिल्म हो भने आशिरमान देशराज जोशी स्टारर ‘ब्रेकअप’ एउटा सामान्य लभस्टोरी फिल्म हो ।

अनमोलको ‘क्याप्टेन’

रिलिजअघि निकै चर्चामा रहेको यो फिल्म आजैदेखि प्रदर्शनमा उत्रेको छ । यो फिल्ममा अनमोल केसीले इशानको भूमिका निभाएका छन् । फिल्ममा राष्ट्रिय खेलाडीको भूमिकामा अनमोल देखिएका छन् । यस्तै यो फिल्ममा अनमोलका अलावा उपासना सिंह ठकुरी, प्रियंका एमभी, सरोज खनाल, विल्सन विक्रम राई, बुद्धि तामाङ लगायतका कलाकारको अभिनय रहेको छ ।

यो फिल्मलाई दिवाकर भट्टराईले निर्देशन गरेका हुन् भने भुवन केसीले निर्माण गरेका हुन् ।

द ब्रेकअप

आशिरमान देशराज जोशी र शिल्पा मास्के स्टारर फिल्म ‘द ब्रेकअप’ पनि आजैबाट रिलिज भएको छ । यो फिल्ममा एउटा सामान्य लभस्टोरी छ, जुन स्टोरीमा शिल्पा र आशिरमानको रोमान्स देख्न सकिन्छ । यस्तै फिल्ममा इच्छा कार्की र रेमनदास श्रेष्ठ, सरोज खनाल लगायतका कलाकारले अभिनय गरेका छन् ।

यद्यपि बिहानी शोलाई हेर्दा दुवै फिल्मले आक्रामक व्यापार गर्न सकेका छैनन् । बुधवार हेलिकोप्टर दुर्घटनामा परेर निधन भएका पर्यटनमन्त्री रवीन्द्र अधिकारीसहित अन्य सात जनाको टुँडिखेलमा भएको श्रद्धाञ्जलीसभाका कारण पनि दर्शक हलसम्म नआएको अनुमान गरिएको छ ।

‘द ब्रेकअप’ मा हेमराज बिसीको लेखन तथा निर्देशन रहेको छ ।