काठमाडौं- भारतीय प्रधानमन्त्री नरेन्द्र मोदीले द्विपक्षीय सहकार्य थप विस्तार गर्न भारत र भेनेजुएला सहमत भएको बताएका छन् । भेनेजुएलाकी कार्यवाहक राष्ट्रपति डेल्सी रोड्रिग्वेजसँग टेलिफोन कुराकानी गरेपछि प्रधानमन्त्री मोदीले यस्तो बताएका हुन् ।

सामाजिक सञ्जालमा पोस्ट गर्दै प्रधानमन्त्री मोदीले आगामी दिनमा दुई मुलुकबीचको सहकार्यले नयाँ उचाइ लिने विश्वास व्यक्त गरे । गत महिनामा अमेरिकाले विशेष कारवाही गरी राष्ट्रपति निकोलस मादुरोलाई नियन्त्रणमा लिएपछि डेल्सीले कार्यवाहक राष्ट्रपतिको जिम्मेवारी सम्हाल्दै आएकी छिन् ।

भारतीय प्रधानमन्त्री कार्यालयले जारी गरेको विज्ञप्तिमा दुई नेताबीच व्यापार तथा लगानी, ऊर्जा, डिजिटल प्रविधि, स्वास्थ्य, कृषि र जनस्तरको सम्बन्ध विस्तार गर्न सहमती भएको उल्लेख छ । त्यसबाहेक दुई नेताबीच विश्वव्यापी तथा क्षेत्रीय मुद्दाका विविध विषयमा पनि छलफल भएको जनाइएको छ ।