काठमाडौं- चीनमा पूर्वन्यायमन्त्रीलाई आजीवन कारावसको सजाय सुनाइएको छ । अदालतले पूर्वचिनियाँ न्यायमन्त्री ताङ यिजुनलाई आजीवन कारावासको सजाय सुनाएको हो ।

झण्डै २ करोड अमेरिकी डलर घुस लिएको अभियोगमा दोषी ठहर गर्दै उनलाई कारावासको सजाय सुनाइएको हो । ६४ वर्षीय ताङ सन् २०२० देखि २०२३ सम्म चीनको न्यायमन्त्री थिए । त्यसअघि उनले लियाओनिङ प्रान्तको गभर्नर र निङ्बो शहरको चिनियाँ कम्युनिष्ट पार्टी प्रमुखको भूमिका पनि निभाएका थिए ।

उनले सन् २००६ देखि २०२२ सम्म पदको दुरुपयोग गरी विभिन्न संस्था तथा व्यक्तिलाई लाभ पुर्‍याएको सियामेन मध्यवर्ती जनअदालतले जनाएको छ । सो क्रममा उनले १३ करोड ७० लाख युआन अर्थात् १ करोड ९७ लाख डलर घुस लिएको अदालतको ठहर छ ।

सत्तामा आएदेखि राष्ट्रपति सी जिन्पिङले चीनमा भ्रष्टाचारविरोध विशेष अभियान सञ्चालन गर्दै आएका छन् । आलोचकहरुले भने राष्ट्रपति सीले आफ्ना प्रतिस्पर्धीलाई तह लगाउनका लागि यस अभियानको राजनीतिक दुरुपयोग गरेको आरोप लगाउने गरेका छन् ।