काठमाडौं- पूर्वराष्ट्रपति दम्पत्ति बाराक र मिशेल ओबामालाई बाँदरको स्वरुप दिएको भिडियो आफ्नो सामाजिक सञ्जाल अकाउन्टबाट सार्वजनिक भएकोमा अमेरिकी राष्ट्रपति डोनाल्ड ट्रम्पले निन्दा गरेका छन् । उनले गत बिहीबार उक्त भिडियो सार्वजनिक गरेका थिए ।

यद्यपि उक्त भिडियो रंगभेदी भएको भन्दै राष्ट्रपति ट्रम्पको चर्को आलोचना भएको थियो । आलोचना भएपछि पोस्ट गरेको १२ घण्टामै उक्त भिडियो हटाइएको थियो ।

ट्रम्पको ट्रुथ सोसलमा प्रकाशित एक मिनेट लामो भिडियोमा २०२० को चुनावमा धाँधली भएको भन्ने ट्रम्पको दाबीलाई दोहो¥याइएको थियो । उक्त भिडियोको अन्त्यतिर ओबामा दम्पत्तिलाई बाँदरको स्वरुपमा नाचिरहेको देखाइएको थियो ।

भिडियोको उक्त अंश कृत्रिम बुद्धिमत्ता एआईले बनाएजस्तो देखिने समाचार संस्था रोयटर्सले जनाएको छ ।

राष्ट्रपति ट्रम्पले ह्वाइट हाउसका सहयोगीद्वारा आफ्नो अकाउन्टमा पोस्ट गरिएकोे उक्त भिडियो आफूले पूरै नहेरेको टिप्पणी गरेका छन् ।

‘मैले सबै कुरो हेरिनँ ।’ सञ्चारकर्मीसँगको कुराकानीमा ट्रम्पले भने, ‘मैले शुरुको भाग हेरेको थिएँ, र त्यो मेसिनमा भएको मतदान धाँधलीसँग सम्बन्धित थियो, यो कति खराब छ, कति घिनलाग्दो छ । त्यसपछि यो कुरो मैले मान्छेलाई दिएँ । प्रायः उनीहरुले सबै कुरा हेर्छन् । तर, मेरो विचारमा कसैले त्यसो गरेन ।’

त्यसपछि सञ्चारकर्मीले ‘त्यस क्लिपको निन्दा गर्नुहुन्छ ?’ भनेर सोधेका थिए ।

जवाफमा राष्ट्रपति ट्रम्पले पक्कै पनि आफूले त्यसको निन्दा गर्ने प्रतिक्रिया दिएका थिए । यद्यपि उनले यसबारे माफी माग्न भने अस्वीकार गरेको रोयटर्सले जनाएको छ ।