काठमाडौं- पाकिस्तानको राजधानी इस्लामावादको मस्जिदमा भएको आत्मघाती बम हमलामा परी ज्यान गुमाउनेको सङ्ख्या ३१ पुगेको छ । इस्लामावादको तरलाइ क्षेत्रमा रहेको इमाम बरगाह कसर ए खदिजातुल कुब्र मस्जिदमा आत्मघाती हमलाकारीले बम विस्फोट गराएको हो ।

शुक्रबारको प्रार्थाना चलिरहेका बेला बम हमला भएको अल जजीराले उल्लेख गरेको छ । घटनामा ३१ जनाको ज्यान गएको पाकिस्तानबाट प्रकाशित हुने डन अखबारको अनलाइन संस्करणले जनाएकोे छ ।

उज्बेकिस्तानका राष्ट्रपति शभकत मिर्जियोएभ दुई दिने पाकिस्तान भ्रमणमा रहेका बेला इस्लामावादमा विस्फोट भएको हो ।

घटनामा अरु १ सय ६९ जना घाइते भएका छन् । घाइतेको उपचार भइरहेका अस्पतालमा रगत अभाव देखिएको छ । अस्पताल र स्थानीय प्रशासनले घाइतेको सहयोगमा रक्तदान गर्न सर्वसाधारणसमक्ष आह्वान गरेका छन् ।

सामाजिक सञ्जाल तथा पाकिस्तानी सञ्चार माध्यमले सार्वजनिक गरेका घटनास्थलका तस्बिर र भिडियोमा मस्जिदको भग्नावशेषमा रगताम्य शव लडिहेको देखिन्छ ।

हाल घटनास्थललाई सुरक्षाकर्मीले पूर्ण रुपमा नियन्त्रणमा लिएर अनुसन्धान गरिरहेको डनले उल्लेख गरेको छ ।

प्रधानमन्त्री शहबाज शरिफले आक्रमणको निन्दा गरेका छन् ।