काठमाडौं- रौतहटमा चुनावी अभियानका क्रममा प्रयोग गरिएको सवारी साधनको ठक्करबाट चार वर्षीया बालिकाको निधन भएको घटनाप्रति राष्ट्रिय स्वतन्त्र पार्टी (रास्वपा)ले गहिरो दुःख व्यक्त गरेको छ।

शुक्रबार महामन्त्री कविन्द्र बुर्लाकोटीले जारी गरेको विज्ञप्तिमा उक्त घटनाले आफूहरूलाई अत्यन्तै स्तब्ध र मर्माहत बनाएको उल्लेख गरेका छन् । बुर्लाकोटीले मृतक बालिकाप्रति श्रद्धाञ्जली दिँदै छानबिनका लागि सघाउने जनाएका छन् ।

रास्वपाले घटनालाई गम्भीर रूपमा लिँदै वस्तुनिष्ठ छानबिनका लागि स्थानीय प्रशासनलाई पूर्ण सहयोग गर्ने प्रतिबद्धता जनाएको छ।

कानुनी प्रक्रिया पूरा गर्दै पीडित परिवारलाई न्याय दिलाउने विषयमा पार्टीले कुनै कसर बाँकी नराख्ने विज्ञप्तिमा बुर्लाकोटीले उल्लेख गरेका छन् ।

पीडित परिवारलाई राहत र सहयोग उपलब्ध गराउन पार्टीका तर्फबाट आवश्यक पहल भइरहेको पनि उनलले बताएका छन् ।

पार्टीले आगामी दिनमा यस्ता घटना दोहोरिन नदिन चुनावी अभियानका क्रममा प्रयोग हुने सवारी साधनको परिचालनमा उच्च सतर्कता अपनाउन निर्देशन दिएको छ।

उम्मेदवार, पार्टीपंक्ति र सवारी चालकहरूलाई सुरक्षा संवेदनशीलतालाई प्राथमिकतामा राखेर जिम्मेवार ढंगले काम गर्न कडा निर्देशन जारी गरिएको रास्वपाले जनाएको छ।