काठमाडौं- बंगलादेशका एक जना प्रभावशाली अल्पसङ्ख्यक नेताले राष्ट्रिय चुनावअघि आवश्यक सुरक्षा प्रत्याभूतिको माग गरेका छन् । बंगलादेश हिन्दू बौद्ध इसाई एकता परिषदका अध्यक्ष नीमचन्द्र भौमिकले अन्तरिम सरकारसमक्ष यस्तो माग राखेका हुन् ।

उनले अल्पसङ्ख्यक समुदायका व्यक्तिलाई लक्षित गरी भइरहेका दमनविरुद्ध आवश्यक कदम चाल्न पनि सरकारसमक्ष आग्रह गरेका छन् । भारतीय समाचार संस्था एएनआईसँगको कुराकानीका क्रममा उनले आफूहरु चुनावमा सहभागी हुन इच्छुक रहेपनि यसका लागि सरकारले उचित वातावरण बनाउनुपर्ने बताए ।

उनले निर्वाचन आयोग, सरकार र राजनीतिक दलहरुले यसतर्फ ध्यान नदिएको आरोप पनि लगाए । उनले बंगलादेशका अल्पसङ्ख्यक समुदाय न्यायको प्रतिक्षामा रहेको बताए ।

उनले स्वतन्त्रता सङ्ग्राम, समानता, मानवीय मर्यादा र सामाजिक न्यायका आधारमा बंगलादेशको स्थापना भएको स्मरण गर्दै यसलाई नबिर्सिन सरकारसमक्ष आग्रह गरे ।