काठमाडौं – फागुन १ गतेलाई प्रदर्शन मिति तोकिएको फिल्म ‘शिवांश’को ट्रेलर बिहीबार सार्वजनिक भएको छ । ट्रेलरमा फिल्मका शीर्ष नायक प्रवीण खतिवडालाई अघोरीको भूमिकामा देखाइएको छ ।

साधुको आवरणमा हुने अपराधका घटनाहरुमा आधारित रहेर फिल्म बनेको ट्रेलरमा देखाइएको छ । ट्रेलरमा साधुहरु हत्यामा प्रत्यक्ष सहभागी भएको देखाइएको छ ।

निर्देशक सन्तोषकुमार आत्रेयका अनुसार सांसारिक मोह त्याग गरेर सादगी जीवन बिताइरहेको जस्तो देखिने साधुहरुको डरलाग्दो क्रुर मानसिकता र व्यवहारका बारेमा फिल्म बनेको छ ।

उनका अनुसार यो फिल्ममा हिन्दू धर्मसँग जोडिएका विभिन्न चर्चित पौराणिक घटना पनि समेटिएको छ ।

ट्रेलरमा रहस्यमयी दिव्य शीलाले कलियुमा निम्त्याएको विनाशको पाटो पनि देखाइएको छ । आध्यात्मिक शक्ति प्राप्त गर्ने होडबाजी र त्यसले उत्पन्न गर्ने द्वन्द्व नै ट्रेलरको मुख्य आकर्षण देखिन्छ ।

ट्रेलरमा एकातिर गुफा, मन्त्रोच्चारण र तान्त्रिक विधिहरू देखिन्छन् । अर्कोतिर ल्यापटप, आधुनिक हतियार र प्रहरीको अनुसन्धान पनि देखिन्छ । यसले धार्मिक पाटो र आधुनिक युगको संयोजन रहेको प्रष्ट पार्छ ।

फिल्ममा प्रवीणसहित तेज गिरी, विमला लिम्बू र रुषा न्यौपाने शीर्ष भूमिका छन् । विकास जोशी, प्रदीपकुमार चौधरी, सबिर चुरौटे, उदय कुमार सुब्बा र टीका निरौलालगायत मुख्य भूमिकामा छन् ।

अञ्जान सिनेमाको ब्यानरमा बनेको यस फिल्मको कथा अञ्जान केसीले लेखेका हुन् । स्क्रिनप्ले बारत लिम्बूको छ ।

ट्रेलरको लिकं :