काठमाडौं- पाकिस्तानमा धार्मिक अल्पसङ्ख्यकमाथि हुने हिंसाका घटनामा कमी आएको छैन । यसै क्रममा फैसलावादको जरानवाला क्षेत्रमा एक जना ६ वर्षीया इसाई नाबालिगमाथि यौन दुर्व्यवहार भएको घटना सार्वजनिक भएको छ ।

जरानवालामा बसोबास गर्ने ६ वर्षीया शामाया सलीम नाम गरेकी बालिकामाथि यौन दुर्व्यवहार भएको हो । शिक्षककहाँ ट्युसन पढ्न गएका बेला शिक्षकका भाइले अपहरण गरी उनीमाथि यौन दुर्व्यवहार गरेको जनाइएको छ ।

ट्युसन पढ्न गएकी छोरी घर नफर्केपछि आमाबाबुले सोधखोज गरेका थिए । सोधखोजका क्रममा विद्यालयको हाताभित्र रहेको एउटा कोठामा आमाले रोएको आवाज सुनेकी थिइन् ।

ढोका खोलेर हेर्दा शिक्षकका भाइले पीडितमाथि दुर्व्यवहार गरिरहेका थिए । त्यसलगत्तै आरोपी फरार भएका थिए ।

त्यसपछि पीडितलाई अस्पताल लगिएको थियो । अस्पतालको आग्रहमा पीडितको परिवार प्रहारी चौकी पनि पुगेको जनाइएको छ । हाल घटनाबारे प्रहरीले अनुसन्धान गरिरहेको छ भने फरार आरोपीको खोजी भइरहेको छ ।