सिराहा– उज्यालो नेपाल पार्टीका अध्यक्ष कुलमान घिसिङ बिहीबारबाट मधेशको चुनवाी अभियानमा निस्किएका छन् । उनले सिराहा र धनुषा जोड्ने कमला पुल हुँदै चुनावी अभियान थालेका हुन् ।

ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्रालयका निर्वतमान मन्त्री घिसिङ नदी क्षेत्रमा ह्युम पाइप राखी अस्थायी आवत–जावत गराइएको ठाउँबाट कमला नदी पार गरी सिराहातर्फ लागेका हुन् ।

पार्टीका नेता, कार्यकर्ता र स्थानीयले उनलाई कमला पुलमा स्वागत गरे । तराई–मधेशको जीवनरेखा मानिने हुलाकी राजमार्गअन्तर्गत सिराहा–धनुषास्थित कमला नदीमा अस्थायी डाइभर्सन बनेसँगै वर्षौँदेखिको समस्या अन्त्यतर्फ उन्मुख भएको छ ।

१४ वर्षसम्म पुल नबन्दा स्थानीयवासी जोखिमपूर्ण यात्रा गर्न बाध्य थिए । सवारीसाधनले लामो वैकल्पिक रुट प्रयोग गर्दै आएका थिए । भौतिकमन्त्री रहेका बेला गत मंसिर ५ गते घिसिङले कमला पुलको स्थलगत निरीक्षण गरेका थिए ।

पुल नबन्दाको पीडा र जोखिम देखेपछि उनले समस्या समाधानका लागि नदी क्षेत्रमा ह्युम पाइप राखी अस्थायी आवत–जावतको व्यवस्था गर्न सम्बन्धित निकायलाई निर्देशन दिएका थिए । घिसिङले अस्थायी विकल्पबाटै भए पनि कमला नदी पार गर्न पाउँदा खुसी व्यक्त गरेका छन् ।

१४ वर्षदेखि अलपत्र ४६९ मिटर लामो कमला पुलको बाँकी कामको पनि उनले अवलोकन गरे । चुनावी अभियानका क्रममा उनले धनुषा, सिराहा र सप्तरीका पार्टी उम्मेदवार, कार्यकर्ता र मतदातासँग भेट्ने छन् ।