काठमाडौं– मधेश प्रदेशसभाको आठौँ वार्षिकोत्सव आज विभिन्न कार्यक्रम गरी मनाइँदै छ । दिवसको अवसरमा प्रदेशसभा सचिवालयले रक्तदान, सरसफाईलगायतका विभिन्न कार्यक्रम गर्दैछ ।

२०७४ साल माघ २१ गते पहिलो पटक प्रदेश सभाको बैठक बसेको दिनको सम्झनामा प्रत्येक वर्ष माघ २१ गते वार्षिकोत्सवका रूपमा विभिन्न कार्यक्रम गरी यो दिवस मनाइँदै आएको छ ।

आठ वर्षको अवधिमा मधेस प्रदेशसभामा तीन सय ६५ बैठक बसेको छ । प्रदेशसभा सचिवालयका अनुसार पहिलो कार्यकालका पाँच वर्षमा नवौँ अधिवेशनमार्फत दुई सय २६ बैठक बसेका थियो भने दोस्रो कार्यकालमा हालसम्म एक सय ३९ बैठक बसिसकेको छ ।

पहिलो कार्यकालमा ५५ विधेयक पारित भई ऐन बनेका थिए भने दोस्रो कार्यकालमा संशोधनसहित २२ विधेयक दर्ता हुँदा १५ वटा पारित भएको प्रदेशसभा सचिवालयले जनाएको छ । आठ वर्षमा कुल ७० विधेयक पारित भएका छन् ।