काठमाडौं- नेपाली कांग्रेसका युवा नेता गगन थापाले नेपालबाट एउटा उर्जाशील युवा अस्ताएको बताएका छन् । स्वर्गीय अधिकारीको पार्थीव शरीरमा श्रद्धाञ्जली अर्पण गर्न टुँडिखेल पुगेका थापाले नेपाली राजनीतिक इतिहासमा ठूलो क्षति भएको बताए ।

अधिकारी क्षमतावान राजनीतिक नेता रहेको भन्दै थापाले विद्यार्थी राजनीतिकलाई उच्च तहमा पुराउने ठुलो भुमिका अधिकारीले नै खेलेको बताए ।

२०५५ सालतिर मन्त्री अधिकारीकै नेतृत्वमा आन्दोलन गर्दाको क्षण सम्झँदै थापाले भने, ‘मन्त्री अधिकारीले विशुद्ध विद्यार्थी राजनीतिक आन्दोलन गरेर राजनीतिक क्षेत्रमा नयाँ बाटो निर्माण गर्नुभएको थियो । उहाँ राजनीतिक गर्ने युवा विद्यार्थीका लागि विचारक नै हुनुहुन्छ ।’

नेपालको संविधान निर्माणमा पनि अधिकारीको ठूलो योगदान रहेको भन्दै थापाले पहिलो संविधानसभामा सार्वजनिक लेखा समिति र दोस्रो सविधानसभामा विकास समितिका बसेर अधिकारीले गरेका काम अहिले नयाँ मोडलका रुपमा अघि बढेको बताए ।

‘सरकारलाई विकासका लागि समितिबाट उहाँले दिएको दबाब प्रभावकारी थियो,’ थापाले भने, ‘अहिले उहाँले ल्याएका र उहाँले हामीलाई सुनाएका योजना नै देश विकास सम्भव हुने देखिएको छ ।

मन्त्री अधिकारीसँगको अन्तिम भेट सम्झँदै थापाले त्रिभुवन विमानस्थलमा भएको भेटमा परिवारका सबै सदस्य र विशेषगरी छोरीहरुको खबर सोधेको थापाले बताए । उनले यो घटनाले आफूलाई स्तब्ध बनाएको बताए ।