काठमाडौं – निर्वाचन आयोगले आफ्नो वेबसाइटमा सार्वजनिक गरेको उम्मेदवारको सूचीमा परिचयसहितका विवरण अपुरो पाइएको छ । आयोगले माघ १० गते प्रतिनिधिसभा निर्वाचनका लागि प्रत्यक्षतर्फका ३ हजार ४ सय ६ जना उम्मेदवारको बन्द सूची प्रकाशन गरेको थियो ।

तर आयोगद्वारा प्रमाणित सो सूचीमा इलामका दुवै निर्वाचन क्षेत्रका उम्मेदवारमध्ये कसैको पनि शैक्षिक योग्यता र अनुभवसम्बन्धी विवरण उल्लेख गरिएको छैन । यसकारण इलामका मतदाता उम्मेदवारको पृष्ठभूमिबारे जानकारी लिनबाट वञ्चित भएका छन् ।

इलाम मात्र नभई आयोगले प्रमाणीकरण गरेका अन्य केही जिल्लाका उम्मेदवारको परिचयात्मक विवरणसमेत अपुरो रहेको पाइएको छ। डिजिटल माध्यममार्फत उम्मेदवारको योग्यता सार्वजनिक गर्ने आयोगको दायित्व व्यवहारमा पूर्ण रूपमा कार्यान्वयन हुन नसकेको देखिएको छ ।

इलाममा प्रतिनिधिसभा निर्वाचनका लागि २४ जना पुरुष र ३ जना महिला गरी जम्मा २७ जना उम्मेदवार रहेका छन्। तीमध्ये एक जना स्वतन्त्र उम्मेदवार हुन् ।

मतदाता संख्याका आधारमा इलाम महत्त्वपूर्ण जिल्ला मानिन्छ । जिल्ला निर्वाचन कार्यालयका अनुसार हाल इलाममा २ लाख ३१ हजार ८ सय ९ मतदाता कायम छन् । तीमध्ये १ लाख १९ हजार ६ सय ४८ पुरुष, १ लाख १२ हजार १ सय ५८ महिला र ३ जना तेस्रोलिङ्गी मतदाता रहेका छन् । वि.सं. २०७९ को निर्वाचनमा इलाममा २ लाख २४ हजार ८ सय ७७ मतदाता थिए भने यसपटक ६ हजार ९ सय ३२ मतदाता थपिएका छन् ।

आउँदो निर्वाचनका लागि इलाम क्षेत्र नम्बर–१ मा १ लाख १२ हजार ३ सय २० र क्षेत्र नम्बर–२ मा १ लाख १९ हजार ४ सय ८९ मतदाता छन् । निर्वाचन प्रयोजनका लागि जिल्लामा १ सय ९० मतदान स्थलमा २ सय ५० मतदान केन्द्र कायम गरिएको छ ।