काठमाडौं- बंगलादेशको अवस्था खराब बन्दै गएकोमा बेलायती सांसदले चिन्ता व्यक्त गरेका छन् । बेलायती सांसद बब ब्ल्याकम्यानले बंगलादेशमा अल्पसङ्ख्यक, विशेषगरी हिन्दूमाथिको हिंसा बढिरहेको भन्दै चिन्ता व्यक्त गरेका हुन् ।

उनले बंगलादेशका हिन्दू मन्दिर र हिन्दू धर्मावलम्बीको घरमा आगजनी भएको, सडकमै उनीहरुको हत्या हुने गरेको पनि जनाए । संसदमा बोल्दै सांसद ब्ल्याकम्यानले आगामी फेब्रुअरी १२ मा तोकिएको निर्वाचनप्रति पनि चासो व्यक्त गरे ।

देशको मुख्य राजनीतिक दल अवामी लिगमाथि प्रतिबन्ध लागेको अवस्थामा हुने चुनावले लोकतान्त्रिक निकास दिनेमा उनले आशंका व्यक्त गरे । उनले बंगलादेशमा बढ्दो इस्लामिक अतिवादप्रति पनि चिन्ता जाहेर गरे ।

उनले आफ्ना विदेश मन्त्रीलाई बंगलादेशको निर्वाचनलाई स्वतन्त्र, निष्पक्ष र समावेशी बनाउन र अल्पसङ्ख्यकको सुरक्षालाई ध्यान दिँदै कदम चाल्न पनि आग्रह गरे ।

बेलायतको संसदमा बंगलादेशको अवस्थाबारे बारम्बार चिन्ता जाहेर हुने गरेको छ । यसअघि गत साता चार जना सांसदहरुले संयुक्त विज्ञप्ति जारी गर्दै बंगलादेशको अवस्थाबारे चासो राखेका थिए ।