काठमाडौँ– दक्षिण भारतीय सुपरस्टार अल्लू अर्जुनको ‘पुष्पा’ फ्रेन्चाइजीले दर्शकहरूको मन जित्दै आएको छ। पहिलो भाग ‘पुष्पा’ ले उत्साह जगाएपछि दोस्रो भाग ‘पुष्पा २: द रूल’ ले विश्वव्यापी रुपमा १७४२ करोड रुपैयाँभन्दा बढी आम्दानी गर्दै नयाँ कीर्तिमान कायम गरेको थियो। अहिले फ्यानहरू ‘पुष्पा ३: द रैम्पेज’ को प्रतिक्षामा छन्।

भारतीय मिडियाका अनुसार बलिउडका सुपरस्टार सलमान खान ‘पुष्पा ३’ मा ‘सुल्तान’ नामक नयाँ पात्रको रूपमा प्रवेश गर्नेछन्। यस पात्रले फिल्ममा बिलेनियर मास्टरमाइंड र व्यापार टाइकूनको भूमिका निभाउने बताइएको छ। यस अपडेटले सामाजिक सञ्जालमा ठूलो चर्चा र उत्साह सिर्जना गरेको छ।

फिल्मको प्रोडक्शन हाउसले ‘पुष्पा ३’ लाई विस्तारित सिनेमाटिक युनिभर्सको रूपमा निर्माण गर्ने योजना बनाएको छ। यसका लागि नयाँ पात्र र कथाहरू पनि थपिनेछन्। तर, शूटिंग सुरु हुन अझ केही समय लाग्ने देखिन्छ, किनभने अल्लू अर्जुन र निर्देशक सुकुमार अन्य प्रोजेक्टहरूमा व्यस्त छन्। सुकुमारले राम चरणसँगको अर्को फिल्म पूरा गरेपछि मात्र ‘पुष्पा ३’ मा काम सुरु गर्ने योजना रहेको छ।

फिल्मको प्रदर्शन २०२८ मा हुने अपेक्षा गरिएको छ। फ्यानहरू अल्लू अर्जुन र सलमान खानलाई एकसाथ पर्दामा देख्ने मौका पाउनेमा उत्साहित छन्, र यसले पुष्पा फ्रेन्चाइजलाई नयाँ उचाइमा पुर्‍याउने विश्वास गरिएको छ।