काठमाडौं- भारत सरकारले नेपाललाई प्रदान गरेको निर्वाचनसम्बन्धी सहयोगको पहिलो चरण आज हस्तान्तरण गरिएको छ। गृह मन्त्रालयमा मंगलबार आयोजित कार्यक्रममा भारतको तर्फबाट प्रदान गरिएको सहयोग गृह मन्त्री ओमप्रकाश आर्याललाई बुझाइएको हो।

नेपालस्थित भारतीय दूतावासका कार्यवाहक राजदूत डा. राकेश पाण्डेले ६० भन्दा बढी डबल क्याब पिकअप सवारीसाधन तथा अन्य सामग्री हस्तान्तरण गरेका हुन्। यी सवारीसाधन र सामग्री आगामी निर्वाचनको तयारीका लागि नेपाल सरकारले माग गरेको सहयोगअन्तर्गत रहेका छन्।

कार्यक्रममा गृह मन्त्री आर्यालले भारत सरकार र भारतीय जनताप्रति सहयोगका लागि आभार व्यक्त गरे। उनले नेपाल–भारत सम्बन्ध गहिरो, व्यापक र बहुआयामिक रहेको उल्लेख गर्दै यस किसिमको सहयोगले दुई देशबीचको आपसी विश्वास झनै बलियो बनाएको बताए।

भारतले सन् २००८ देखि नेपाललाई निर्वाचनसम्बन्धी सहयोग प्रदान गर्दै आएको छ। यस अवधिमा भारत सरकारले निर्वाचन आयोगसहित विभिन्न मन्त्रालय र निकायलाई करिब २ हजार ४ सय सवारीसाधन उपलब्ध गराइसकेको छ।

आगामी निर्वाचनका लागि भारतले करिब ६ सय ५० सवारीसाधन सहयोगस्वरूप उपलब्ध गराउने जनाएको छ। ती सवारीसाधन आगामी केही हप्ताभित्र चरणबद्ध रूपमा नेपाललाई हस्तान्तरण गरिनेछ।

भारतीय पक्षबाट हुँदै आएको निरन्तर सहयोगले नेपाल–भारत विकास साझेदारीको बहुपक्षीय स्वरूपलाई प्रतिबिम्बित गर्नुका साथै दुवै देशका जनताबीचको मित्रता र आपसी विश्वासको प्रतीक बनेको दूतावासले जनाएको छ।