काठमाडौं- आगामी फागुन २१ मा आयोजना हुन गइरहेको प्रतिनिधिसभाको निर्वाचनमा भक्तपुर २ मा तीन सञ्चारकर्मीबीच रोचक प्रतिस्पर्धा हुने देखिएको छ । यो क्षेत्र नेकपा एमालेका सचिव महेश बस्नेतको गढ मानिन्छ ।

यहाँबाट नेपाली कांग्रेसले कवीर राणालाई टिकट दिएको छ । देशान्तर मिडिया ग्रुपका अध्यक्ष कविर राणा पत्रिका रेडियो सञ्चालक हुन् । देशान्तर साप्ताहिकको प्रधानसम्पादक रहेका राणा यसअघिका चुनावमा चर्चा भए पनि यो पटक टिकट पाउन सफल भएका हुन् ।

त्यसैगरी, सोही निर्वाचन क्षेत्रबाट राष्ट्रिय स्वतन्त्र पार्टी रास्वपाले राजिव खत्रीलाई उम्मेदवार उठाएको छ । टेलिभिजन पत्रकारिता गर्दागर्दै दलीय राजनीतिमा हामफालेका राजीव खत्री सामाजिक सञ्जालमा महेश बस्नेतको खरो आलोचना गर्ने पात्र मानिन्छन् । उनले लामो समय एभिन्यूज र न्यूज २४ च्यानलमा पत्रकारिता गरेका थिए ।

त्यसैगरी, सोही क्षेत्रबाट प्रगतिशील लोकतान्त्रिक पार्टी प्रलोपाले पत्रकार जन्मदेव जैसीलाई टिकट दिएको छ । यसअघि उनी रातोमसी अनलाइनमा सम्पादक थिए । उनी पत्रकारको हकहितका लागि काम गर्ने अभियन्ता हुन् ।