काठमाडौं- पूर्वशिक्षा मन्त्री सुमना श्रेष्ठ नेपाली कांग्रेसको नेतृत्वसँग संवादमा जुटेकी छन् ।

उनी र गगन थापा नेतृत्वको नेपाली कांग्रेसका नेताहरूबीच संवाद भइरहेको छ। मंगलबार प्रतिनिधिसभाको उम्मेदवारी दर्ता गराउनुअघि सभापति गगनसहितका नेताहरूसँग उनले पार्टी प्रवेश वा सम्भावित सहकार्यबारेमा संवाद थालेकी हुन् ।

गगनहरू यतिबेला कांग्रेसको उम्मेदवार छनोट रस्साकस्सीमा छन् । गगन, निवर्तमान सभापति शेरबहादुर देउवा र डा. शेखर कोइराला तीनै पक्षको सूची एक ठाउँमा राखेर अहिले उम्मेदवार तय गर्ने काम हुँदैछ ।

उम्मेदवारी दिन एक दिन बाँकी हुँदा रास्वपाकी पूर्वनेतृ सुमना श्रेष्ठसँग छलफल चलिरहेको सभापति थापानिकट एकजना नेताले पुष्टि गरेका छन् ।

‘अहिले सामाजिक सञ्जालमा चलिरहेको चर्चा सत्य हो, तर सुमनासँग अहिले नै कुरा फाइनलाइज भइसकेको छैन’, उनले भने, ‘हामी छलफलमै छौँ, भरेसम्म कुरा मिलेर केही निर्णय हुन सक्छ।’

उनले गत भदौ २३ र २४ को जेन-जी आन्दोलनपछि सभापति रवि लामिछानेको कार्यशैलीमा तीव्र असन्तुष्टि जनाउँदै रास्वपा छाडेकी थिइन् । रविले नख्खु कारागारबाट बलजफ्ती निस्केको कुरामा पनि सुमनाले गम्भीर आपत्ति जनाएकी थिइन् ।

त्यसपछि उनी काठमाडौं महानगरपालिकाका तत्कालीन मेयर बालेन्द्र साहको समूहसँग निकट थिइन् । उनले उज्यालो नेपालका अध्यक्ष कुलमान घिसिङसँग पनि संवाद गरेकी थिइन् । उनी बालेन्द्रको समूहमा मिसिएर रास्वपा फर्किने चर्चा थियो । तर रविले आफ्ना कट्टर आलोचक उनलाई स्वीकारेनन् ।