चितवन – राष्ट्रिय स्वतन्त्र पार्टी (रास्वपा)ले नेताहरूको निर्वाचन क्षेत्र टुंग्याउन थालेको छ । उपसभापति डा. स्वर्णिम वाग्ले तनहुँ– १ बाट निर्वाचन लड्ने पक्का भएको छ।

वाग्ले उम्मेदवार छनोट सिफारिस समितिका संयोजक समेत हुन् । शनिबार बसेको समितिको बैठकले समितिका अरू सदस्य शिशिर खनाल र सोविता गौतमले निर्वाचन लड्ने क्षेत्रसमेत तय गरेको छ।

खनाल यसअघि निर्वाचित भएको काठमाडौं– ६ बाट चुनाव लड्नेछन् । गौतम काठमाडौं २ छाडेर चितवन–३ झर्ने भएकी छिन् । उनी २०७९ को चुनावमा काठमाडौं–२ बाट विजयी भएकी थिइन् ।

काठमाडौं २ लाई रास्वपा नेता बालेन्द्र साहले आफ्नो लागि विकल्पमा राखेका छन् । उनी झापा ५ मा गएर नेकपा एमालेका अध्यक्ष केपी शर्मा ओलीसँग लड्नेबारे पनि छलफलमा छन्। तर अझै निर्णय भएको छैन ।

चितवन–३ मा नेकपाबाट भरतपुर महानगरपालिकाकी मेयर रेनु दाहाल उठ्ने तयारी छ । रेनु उठेमा दुई चर्चित नेतृको कडा भिडन्त हुने देखिएको छ ।