काठमाडौं- पुष्पकमल दाहाल प्रचण्ड नेतृत्वको नेपाली कम्युनिस्ट पार्टी झापा जिल्ला संयोजक राजु आचार्यले शनिबार पार्टी छाडेको घोषणा गरेका छन् ।

आचार्यले सामाजिक सञ्जालमा आफ्ना भनाइ राख्दै नेकपा परित्याग गरेको घोषणा गरेका हुन् । ‘प्रचण्डको पार्टी आजको मितिबाट मैले छोडेको जानकारी गराउँछु,’ उनले भनेका छन्,  ‘यो पार्टीसँगको २७ वर्ष लामो यात्रा आजैबाट अन्त्य भएको छ ।’

नेता आचार्यले पार्टीले प्रतिनिधिसभाको सदस्यका लागि टिकट गरेको टिक वितरणमा असन्तुष्टि जनाउँदै पार्टी छोडेका बताइएको छ।

आचार्यले अबका दिनमा स्वतन्त्र नागरिकका रुपमा सक्रिय रहने बताएका छन् । यसअघि गत पुस २४ गते नेकपा इलाम संयोजक एवम् केन्द्रीय सदस्य धीरेन्द्र शर्माले पनि पार्टी छाडेका थिए ।

लामो समयदेखि माओवादीमा सक्रिय रहेका शर्माले तीन दशक लामो संगठनात्मक आबद्धता अन्त्य भएको बताएका थिए ।

उनी इलामका स्थापित तथा प्रभावशाली नेता हुन् । कोशी प्रदेशसभा पूर्वसदस्य समेत रहेका शर्मा जनार्दन शर्मा नेतृत्वको प्रगतिशील लोकतान्त्रिक अभियानमा जोडिएका छन् ।