काठमाडौं– आतंकवादी संगठन इस्लामिक स्टेट इराक र सिरिया (आईएसआईएस)का प्रमुख अबु अल बग्दादी अमेरिकी सैनिक कारबाहीमा मारिएको दाबी गरिएको छ ।

अमेरिकी सञ्चारमाध्यमहरुका अनुसार शनिबार उत्तर–पश्चिम सिरियामा भएको कारबाहीमा आईएसआईएसका प्रमुख बग्दादी मारिएका हुन् ।

उच्च सैनिक स्रोतलाई उद्धृत गर्दै लेखिएका समाचारहरुमा सैनिक कारबाहीमा आईससआईएसका ठूला नेता मारिएको र ती बग्दादी भएको दाबी गरिएको छ ।

अमेरिकी राष्ट्रपति डोनाल्ड ट्रम्पले पनि आईएसआईएसका प्रमुख मारिएको संकेत गर्दै ‘केही ठूलो काम भएको’ बताएका छन् ।

सामाजिक सञ्जाल ट्वीटरमार्फत ट्रम्पले भर्खरै ठूलो काम भएको बताएका छन् ।

Something very big has just happened!

— Donald J. Trump (@realDonaldTrump) October 27, 2019

आईसएआईएसका प्रमुख बग्दादी पछिल्ला ५ वर्षदेदि ‘भूमिगत’ थिए । पछिल्लो समय सन् २०१४ मा बग्दादीको एक भिडियो सार्वजनिक भएको थियो । उनी मोसुलको एक मस्दिमा गएको भिडियोमा देखिएको थियो ।

यसअघि पनि थुप्रैपटक बग्दादी सैनिक कारबाहीको निशाना बनेको खबरहरु सार्वजनिक भएका थिए । सन् २०१८ को फैब्रुअरी महिनामा अमेरिकी अधिकारीहरुले सन् २०१७ को मे महिनामा भएको सैनिक कारबाहीमा परेर बग्दादी घाइते भएका दाबी गरेका थिए ।