काठमाडौं– नेपाली कांग्रेसका नेता हृदयराम थानीले आगामी फागुन २१ गते हुने प्रतिनिधिसभा सदस्य निर्वाचनमा उम्मेदवार नबन्ने निर्णय लिएका छन् । स्वास्थ्यको कारण देखाउँदै उनले यस्तो निर्णय लिएका हुन् ।

सुर्खेत क्षेत्र नं. २ बाट नेपाली कांग्रेसको तर्फबाट उम्मेदवार सिफारिस भएका थानीले करिब दुई महिनादेखि खुट्टामा देखिएको नसासम्बन्धी समस्याका कारण सहजरूपमा हिँडडुल गर्न नसकिरहेको बताएका छन् ।

डाक्टरको सल्लाहअनुसार हाल घरमै फिजियोथेरापिष्टको सहयोगमा उपचाररत रहेकाले माघ ६ गते हुने मनोनयन दर्तामा समेत उपस्थित हुन नसक्ने अवस्था देखिएको उनले बताएका छन् ।

उनले भदौ २३ र २४ गते भएको ‘जेन-जी आन्दोलन’पछि मुलुक अप्रत्यासित राजनीतिक घटनाक्रम र अन्योलको अवस्थाबाट गुज्रिरहेको उल्लेख गरेका छन् ।

यस्तो परिस्थितिमा संविधानलाई लिकमा ल्याउन र मुलुकको स्थिरताका लागि तोकिएकै मितिमा प्रतिनिधिसभा निर्वाचन भएमा ठूलो निकास हुने उनले बताएका छन् ।

थानीले आफू उम्मेदवार नबन्ने निर्णय स्वास्थ्य कारणले लिएको स्पष्ट पार्दै स्वास्थ्यमा सुधार आएपछि अझै सक्रियताका साथ क्रियाशील रहने प्रतिबद्धता जनाएका छन् ।