काठमाडौं- नेपाली कांग्रेसको विशेष महाधिवेशन पक्षधरले सहमतिका लागि अघि सारेको ८ बुँदे प्रस्ताव लिएर महामन्त्री विश्वप्रकाश शर्मा केन्द्रीय कार्यालय सानेपा पुगेका छन् ।

अर्का महामन्त्री गगन थापालाई प्रधानमन्त्रीका रुपमा अघि सार्नुपर्नेसहितका ८ बुँदे प्रस्ताव लिएर संस्थापनसँग वार्ताका लागि महामन्त्री शर्मा सानेपा पुगेका हुन्।

सानेपामा संस्थापनले केन्द्रीय कार्यसमिति राखेर विशेष महाधिवेशन पक्षधरलाई कारबाहीको अर्को तयारी पनि गरिरहेको छ ।

चार दिनदेखि जारी विशेष महाधिवेशनबाट नयाँ नेतृत्व चयन अघि बढिरहँदा शर्माले अन्तिम प्रयत्नस्वरुप संस्थापनलाई आठ बुँदे प्रस्ताव गरेका हुन् । उनी त्यो प्रस्ताव लिएर अहिले सानेपा पुगेका छन् ।

जहाँ कार्यवाहक सभापति पूर्णबहादुर खड्कासहितका संस्थापन पक्षीय नेताहरू कुरिरहेका छन् । त्यहाँ मध्यमार्गी धार समातेका नेता डा. शेखर कोइराला पनि छन् ।

संस्थापनसँग विश्वप्रकाशले संवाद गर्ने भएपछि विशेष महाधिवेशनको निर्वाचन कार्यतालिका अपराह्न ४ बाजेसम्मलाई सारिएको छ ।

विशेष महाधिवेशनमा सभापतिका लागि गगनको मात्रै उम्मेदवारी परेको छ। उता महामन्त्रीका विश्वप्रकाश शर्मा र प्रदीप पौडेलको उम्मेदवारी परेको छ।

विशेष महाधिवेशन पक्षले सबै पदाधिकारी र केन्द्रीय कार्यसमिति सर्वसम्मत गर्ने तयारी गरेको छ। सर्वसम्मत नेतृत्व चयनपछि विशेष महाधिवेशन पक्षधर निर्वाचन आयोगमा जाने तयारीमा छ।