काठमाडौं- भारतले सोमालियाको विवादित क्षेत्र सोमालिल्याण्डलाई औपचारिक मान्यता दिनेबारे त्यहाँका शीर्ष नेतासँग वार्ता गरेको भन्ने सूचना झूठो भएको प्रस्ट पारेको छ । भारतीय विदेश मन्त्रालयको तथ्य चेकजाँच गर्ने निकायले सामाजिक सञ्जालमा भारतीय प्रधानमन्त्री नरेन्द्र मोदीले सोमालिल्याण्डका राष्ट्रपति अब्दिरहमान मोहमद अब्दुल्लाहीसँग वार्ता गरेको भनी सूचना फैलिरहेको भन्दै विश्वास नगर्न आग्रह गरेको हो ।

मोदीले अब्दुल्लाहीसँग वार्ता गरेको भन्दै मिडिल ईस्ट २४ नामक अकाउन्टले सूचना सार्वजनिक गरेपछि विदेश मन्त्रालयले प्रष्टोक्ति दिएको हो । उक्त पोस्टमा संसारकै सबैभन्दा ठूलो लोकतान्त्रिक मुलुकले सोमालिल्याण्डलाई मान्यता दिने तयारी गरिरहेको उल्लेख छ ।

विदेश मन्त्रालयले भारतस्थित राजदूतावासबाट सोमालियाले आफ्ना राजदूत फिर्ता बोलाएको भन्ने सूचना पनि मिथ्या रहेको जनाएको छ । सन् १९९१ मा सोमाली गृहयुद्धपछि सोमालिल्याण्डले स्वतन्त्रता घोषणा गर्दै पृथक सरकार सञ्चालन गर्दै आएको छ ।

हालै इजरायलले उक्त क्षेत्रलाई मान्यता दिएको समाचार सार्वजनिक भइरहेको छ । यसै सन्दर्भलाई जोडेर भारतले पनि उक्त क्षेत्रलाई मान्यता दिने भनी गलत सूचना प्रवाह भइरहेको जनाइएको छ ।